By Bawi Tha Kung
“Bawipa ka sinah a um cu ka hngalh zungzal, amah cu keimah he naihte ah a um I zeihmanh nih an ka hnin kho lo.” – Salm 16:8
Baibal chung I zumtu hna nun zoh tikah Satanpa nih hrawh le hninh a timh lengmang hna. Satanpa rian cu mi hrawh le hlen a si. Amah cu “vawleicung mi vialte a hleng dihtu” a si (Biathlam 12:9). Cuve bantukin nangmah le keimah zong Satanpa nih hrawh, hlen le hninh a kan duh tuk. Sihmanhsehlaw, a kan tei lai lo. A kan hnin kho lai lo. Amen! Zeiruangdah a kan tei lai lo? Zeiruang ah a kan hninh khawh lai lo?
1. «Khrih cu kan Bawipa a si»
David nih, “zeihmanh nih an ka hnin kho lo” a ti cu, Pathian kha, “Nangmah cu ka Bawipa na si” a ti caah a si (Salm 16:2). Kan nunnak ah Khrih kha Bawi a si ahcun zeihmanh nih a kan hnin kho lai lo. Zultu hmasa hna kha harnak, hremnak, thihnak hmanh nih a hnin kho hna lo. Zeicahtiah, Khrih kha an Bawi a si caah si.
2. «Kan nunnak cu Khrih kutchung ah a um»
Nu le pa nih fale an rawh lai le an tlau lai cu sian a si lo bantuk tein Pathian nihhin a fale hi kan rawh lai a siang hrimhrim lo. Thinphang thlalau in kan um ding zong a kan siang lo. Zeitluk ral le harnak tampi lak zongah David ai hninh lonak aruang cu Pathian kut chungah ka um, ti kha ai fian tuk caah a si (Salm 16:5). Salm 121:5-9 ah Pathian bia nih, “Bawipa nih an ven ko lai, nangmah huhphenh awkah
na pawngin an umhnawh ko. Chun ah ni nih harnak an pe lai lo i zan ah thlapa zong nih harnak an pe ve lai lo. Bawipa nih ṭihnak chungin an huhphenh lai i
him tein an chiah lai. Atu in zungzal tiang, na chuahlei siseh, na luhlei siseh,
an zohkhenh zungzal lai,” tiah a kan ti. A sunglawimi khuaruahhar Pathian biakamnak a si.
3. «Khrih cu a kan hruaitu a si»
Pathian cu tuu zakhat lakah pakhat a tlaumi te kha a hmuh hlanlo a kawltu a si (Luka 15). A hruaimi a fale hi kan tlau, kan rawhral, kan i hninh ding cu a duh hrimhrim lo. David nih, “ka hnin lai lo” a tingam nak cu “Bawipa nih a ka hruai” ti kha a hngalh caah a si (Salm 16:7). Thlichia le tilet lak hmanhah Bawipa nih a kan hruai ko ahcun kan i hnin lai lo.
4. «Khrih nih a kan umpi»
Tuu cu a khaltu nih a umpinak kha a theih ahcun hnangam tein a um. A thin a phang lo. A pawngkam ah tihnung ral tampi an um ko zongah a khaltu kha a pawng ah a um I a hmuh paoh ahcun a thin a phang hrimhrim lo. Hnangam tein a um I ramhring kha a ei, a bawk ko. Kan I hnin hrimhrim lai lo, zeicatiah Bawipa nih a kan umpi ko. Amah cu Immanuel Pathian a si (Mathai 1:23).
David hi a nunnak ah harnak phunphun, tuknak le dohnak, hlawtnak, sunghzatlaknak zong a tong ko. Sihmanhsehlaw aa hnin hrimhrim lo. Bawipa kha aa bochan zungzal. Kannih zong, kan nunnak ah thlichia le tilet an tho tawn ve ko lai. Vawlei harnak hna hi kan duh lo zongah kan tong ko lai. Kan i bochan ngaimi kan pawngkam minung hna hmanh nih an kan deuh caan a tampi ko lai.
Zeibantuk thil hmanh va tong ko u sih law, a hninh bel kan i hninh awk a si lo. Kan lungdongh awk a si lo. Kan tluk kan rilh awk a si lo. Zeizong vialte tuah khotu Bawi kan ngei. A thawnnak kut chungah kan um. Amah nih a kan hruai ko lai. Kan sinah a um ko. Cucaah ti kam ah a khomi thingkung bantukin kan i hnin hrimhrim lai lo.
“Pathian cu kanmah lei i a ṭan ahcun aho nih dah an kan doh khawh lai?” – Rom 8:31
“Bawipa ka sinah a um cu ka hngalh zungzal, amah cu keimah he naihte ah a um I zeihmanh nih an ka hnin kho lo.” – Salm 16:8